Մենք միշտ ազնիվ ենք․ Արտետան՝ ֆուտբոլիստների առողջական վիճակի մասին
«Արսենալի» գլխավոր մարզիչ Միկել Արտետան արձագանքել է ակումբի հասցեին հնչած քննադատությանը,ըստ որի, լոնդոնյան ակումբի 11 ֆուտբոլիստներ հրաժարվել էին մարտյան դադարի ընթացքում իրենց ազգային հավաքականներում հանդես գալուց՝ հղում անելով առողջական խնդիրներին։
«Երբ անհրաժեշտ է ներկայացնել յուրաքանչյուր խաղացողի վիճակը, մենք միշտ ազնիվ ենք լինում, իսկ դրանից հետո պետք է ընդունվի բժշկական որոշում։ Մեր խաղացողների վերաբերյալ եզրակացությունները ակնհայտ էին։ Երբ դու առողջ ես և հասանելի ես հավաքականի խաղերին մասնակցելու համար, դու պետք է խաղաս։ Մենք շատ հպարտ ենք, որ մեր այդքան շատ խաղացողներ հրավիրվում են ազգային հավաքականներ», —Արտետայի խոսքերն է մեջբերում BBC-ն։
Ավելի վաղ «Մանչեսթեր Սիթիի» գլխավոր մարզիչ Խոսեպ Գվարդիոլան մարտ ամսին հավաքականների ընկերական հանդիպումները անվանել էր անիմաստ։ Նրա կարծիքով՝ այդ խաղերում չափազանց բարձր է վնասվածքների ռիսկը այն ֆուտբոլիստների համար, որոնց ակումբներում հենց սկսվում է մրցաշրջանի ամենակարևոր հատվածը։
