Խաղում եմ տիտղոսների, այլ ոչ թե միավորների համար․ Սիները՝ ATP-ի վարկանիշային աղյուսակը գլխավորելու հեռանկարի մասին

Աշխարհի 2-րդ ռակետ, իտալացի Յանիկ Սիները խոսել է ATP վարկանիշային աղյուսակի 1-ին հորիզոնականի համար պայքարի մասին։ Նա կարծում է, որ այդ հարցը մեկ մրցաշարով չի վճռվում։ Իտալացին հավելել է, որ խաղում է տիտղոսներ նվաճելու, այլ ոչ թե միավորներ վաստակելու համար։

Սիները հանդես կգա Մոնտե-Կառլոյի «Մասթերսում»։ Մրցաշարը նրա համար կսկսվի երկրորդ շրջանից։

«Երբ դու էլիտար մակարդակի խաղացող ես՝ խաղում ես տիտղոսների համար։ Վարկանիշային միավորները որոշակիորեն երկրորդական են։ Մեկ մրցաշարով հնարավոր չէ որոշել, թե ով կլինի առաջին կամ երկրորդ ռակետը։ Ինձ համար սա մի մրցաշար է, որտեղ հաճույքով եմ խաղում և շատ ուրախ եմ այստեղ գտնվելու համար։ Իհարկե, ձգտում եմ հաղթել հնարավորինս շատ խաղերում», — ասել է Սիները մամուլի ասուլիսի ժամանակ։

Աշխարհի 1-ին ռակետն այս պահին իսպանացի Կարլոս Ալկարասն է՝ 13590 վարկանիշային միավորով։ Սիները 2-րդն է՝ իր ակտիվում ունենալով 12400 միավոր։