Ալաշկերտը հաղթեց Ուրարտուին ու միավորների քանակով հավասարվեց առաջատարներին

Fastex Պրեմիեր լիգայի 22-րդ տուրում «Ալաշկերտը» հյուրընկալվել էր «Ուրարտուին» ու հաղթեց 3։1 հաշվով։

8-րդ րոպեին տանտերերի դարպասապահ Ալեքսանդր Միշիևը սեփական տուգանային հրապարակում խախտեց խաղի կանոնները Մոմո Տուրեի նկատմամբ։ Նշանակված 11-մետրանոցը դիպուկ իրացրեց Կարեն Նալբանդյանը։ 42-րդ րոպեին Միշիևը տուգանային հրապարակից դուրս ձեռքով խաղաց ու հեռացվեց խաղադաշտից։ Ռոբերտ Արզումանյանը Նիկոլաս Կալուկյանի փոխարեն խաղադաշտ դուրս բերեց Անդրեա Դրագոյևիչին։ Առաջին կեսին ավելացրած 2-րդ րոպեին Միգել Վելոսան վերականգնեց հաշվի հավասարությունը։

«Ալաշկերտը» կարողացավ բեկել խաղի ընթացքը 59-րդ րոպեին։ Կարեն Նալբանդյանը հեռահար հարվածով դուբլ գրանցեց՝ առաջ մղելով իր թիմին։ Սա Նալբանդյանի 10-րդ գոլն էր Fastex Պրեմիեր լիգայի ընթացիկ մրցաշրջանում։

Հիմնական ժամանակին ավելացրած 3-րդ րոպեին Նարեկ Աղասարյանը կոպիտ խաղաց Ռոբերտ Հակոբյանի նկատմամբ ու ստանալով երկրորդ դեղինը՝ հեռացվեց խաղադաշտից, իսկ «Ուրարտուն» մնաց 9 հոգով։

Հանդիպման վերջնական հաշիվը ձևակերպեց Ջեֆերսոն Գրանադոն՝ հիմնական ժամանակին ավելացրած 7-րդ րոպեին։ Գրանադոն բացեց իր գոլերի հաշիվը «Ալաշկերտում»։



Այս հաղթանակից հետո Վահե Գևորգյանի գլխավորած թիմն ունի 42 միավոր ունի։ Նույնքան ունի նաև «Ուրարտուն»։

Հիշեցնենք, որ տուրի մեկնարկային խաղում «Փյունիկը» սենսացիոն պարտություն էր կրել հետնապահ «Արարատից», ԲԿՄԱ-ն ու «Գանձասարը» հաղթողին չէին պարզել։

22-րդ տուրում կկայանան նաև «Նոա»-«Վան» և «Շիրակ»-«Արարատ-Արմենիա» հանդիպումները։