Մարտին Պողոսյանը պոկումում 10-րդն էր, բայց նվաճեց բրոնզե մեդալ

Վրաստանի Բաթումի քաղաքում ընթացող ծանրամարտի Եվրոպայի առաջնության 79 կգ քաշային տղամարդկանց պայքարում Հայաստանի ներկայացուցիչ Մարտին Պողոսյանը երկամարտի 338 կգ արդյունքով նվաճեց բրոնզե մեդալ։

Հայ ծանրորդը պոկել էր 152 կգ և միայն 10-րդն էր։ Հրում վարժությունում 20-ամյա Պողոսյանը գրանցեց 186 կգ արդյունք ու նվաճեց փոքր արծաթե մեդալ։

Ռուսաստանը ներկայացնող Գևորգ Սերոբյանը հռչակվեց Եվրոպայի չեմպիոն՝ պոկելով 161, հրելով 180 կգ ու գրանցելով երկամարտի 341 կգ արդյունք։

Հիշեցնենք, որ ավելի վաղ Հայաստանի ներկայացուցիչներից արծաթե մեդալ էին նվաճել Գառնիկ Չոլաքյանը, Ալեքսանդրա Գրիգորյանը, Գոռ Սահակյանը։