Այսօր մեր լավագույն խաղն էր․ Արտակ Օսեյան

Ֆաստեքս ՀՊԼ 23-րդ տուրի «Փյունիկ» - «Ուրարտու» խաղից հետո կայացել է «Փյունիկի» գլխավոր մարզիչ Արտակ Օսեյանի մամուլի ասուլիսը։  

«Այսօր մեր լավագույն խաղն էր որակական առումով։ Խաղի պլանն աշխատեց։ Ճիշտ է, վերջին 10 րոպեում լարվածություն մտավ խաղի մեջ, բայց բոլոր առումներով, կարծում եմ, որ մենք մրցակցից լավն էինք ու արժանիորեն հաղթեցինք»,-ասաց Օսեյանը։ 

Խոսելով խփած երկրորդ գոլից հետո սխեմայի փոփոխության մասին Օսեյանն ասաց․ 

«Մինչև դա էլ որոշեցինք, որ պետք է փոխենք սխեման։ Մենք մեծ առավելություն ունեինք, բայց  թիմը չի կարող 90 րոպե շարունակ մեկը մեկի դեմ պրեսինգ անել, այդ պատճառով գնացինք այդ որոշմանը։ Ուղղակի մինչև Միլկովիչի դաշտ դուրս գալը հաջողվեց երկրորդ գոլը խփել։ Այսօր մեծ ռիսկի էինք գնացել ու ինձ ուրախացրեց առանց գնդակի խաղը, որը շատ արագ, ինտենսիվ էր ու թիմի մեջ  ագրեսիա կար։ Հաշվի առնելով «Ուրարտուի» խաղաոճը՝ այդ առումով գերազանցեցինք նրանց»։