Վազգեն Թևանյանը կպայքարի բրոնզե մեդալի համար

Ալբանիայի մայրաքաղաք Տիրանայում ընթացող ազատ ոճի ըմբշամարտի Եվրոպայի առաջնության 65 կգ քաշային կարգում Հայաստանի ներկայացուցիչ Վազգեն Թևանյանը կիսաեզրափակիչում 3։3 հաշվով զիջեց ռուս Բաշիր Մագոմեդովին ու կպայքարի բրոնզե մեդալի համար։

Թևանյանն ուներ 3 միավոր առավելություն, սակայն Մագոմեդովը 2 միավորանոց հնարք կատարեց։ Հայ ըմբիշի մարտավկաները չելենջի դիմեցին, որում պարտվեցին և հաշիվը հավասարվեց, իսկ առավելությունն անցավ ռուս ըմբիշին։

Գոտեմարտի ավարտից 3 վայրկյան առաջ Թևանյանն աշխատանքային գոտուց դուրս էր հանել մրցակցին և պահանջում էր արձանագրել միավորը, սակայն Վազգենին միավոր չշնորհվեց, իսկ բողոքարկելու հնարավորություն այլևս չկար։

Ավելի վաղ Թևանյանը պայքարից դուրս էր թողել Ֆրանսիան ներկայացնող Խամզատ Արսամերզուևին (5։2) և Բուլղարիան ներկայացնող Շամիլ Մամեդովին (2։1)։

Հիշեցնենք, որ այսօր պայքարի մեջ մտած 57 կգ քաշային Մանվել Խնձրցյանը զիջեց կիսաեզրափակիչում ու կպայքարի բրոնզե մեդալի համար։ 70 կգ քաշային Դավիթ Մարգարյանն ու 79 կգ քաշային Հրայր Ալիխանյանը զիջել են մեկնարկում ու մրցակիցների եզրափակիչ դուրս գալու պարագայում կստանան սփոփիչ գոտեմարտեր անցկացնելու հնարավորություն։

Վաղը պայքարի մեջ կմտնեն 61 կգ քաշային Արսեն Հարությունյանը, 74 կգ քաշային Նարեկ Հարությունյանը, 92 կգ քաշային Մուշեղ Մկրտչյանն ու 125 կգ քաշային Խաչատուր Խաչատրյանը։