Ձեզ օտարերկրացի մարզիչ պետք չէ․ Մոուրինյուն մերժել է Իտալիայի հավաքականը գլխավորելու տարբերակը
«Բենֆիկայի» գլխավոր մարզիչ Ժոզե Մոուրինյուն կարծում է, որ Մասիմիլիանո Ալեգրին կամ Անտոնիո Կոնտեն կարող են գլխավորել Իտալիայի հավաքականը:
«Ինձ հարցրին՝ արդյոք կցանկանայի՞ մարզել ձեր ազգային հավաքականը. իմ պատասխանն այն է, որ ձեզ օտարերկրացի մարզիչ պետք չէ: Դուք ունեք Ալեգրիին, Կոնտեին, կարող եմ նաև այլ անուններ տալ:
Շատերը զարմանում են, թե ինչպես է Պորտուգալիային՝ 10 միլիոն բնակչություն ունեցող երկրին, հաջողվում հայտնվել աշխարհի առաջնություններում և ունենալ այդքան տաղանդավոր խաղացողներ, որոնք ի վերջո հայտնվում են Եվրոպայի լավագույն թիմերում: Եկեք և տեսեք, թե ինչպես են կազմակերպված երիտասարդական մրցաշարերը, ինչպիսի պայմաններ կան այդ թիմերում: Դա բավական է հասկանալու և, հնարավոր է, օրինակ վերցնելու համար», – ասել է Մոուրինյուն Il Giornale-ին տված հարցազրույցում:
Այս պահին Ալեգրին գլխավորում է «Միլանը», իսկ Կոնտեն՝ «Նապոլին»: Մոուրինյուն նախկինում Իտալիայում աշխատել է որպես «Ինտերի» և «Ռոմայի» գլխավոր մարզիչ:
Հիշեցնենք, որ Ջենարո Գատուզոն լքել էր Իտալիայի ազգային հավաքականի գլխավոր մարզչի պաշտոնը այն բանից հետո, երբ թիմը չկարողացավ որակավորվել ԱԱ-2026-ին:
