Երազանքի աշխատա՞նք. FOX Sports-ը 50,000 դոլար է առաջարկում 2026 թվականի աշխարհի առաջնության բոլոր խաղերը դիտելու համար

Ամերիկյան FOX Sports հեռուստաալիքը հայտարարել է ֆուտբոլի երկրպագուների համար անսովոր թափուր աշխատատեղի մասին. ընկերությունը փնտրում է մեկին, ով կդիտի 2026 թվականի աշխարհի առաջնության բոլոր խաղերը և կստանա դրա համար 50 հազար դոլար։ Նախագիծն իրականացվում է Indeed զբաղվածության հարթակի հետ համագործակցությամբ և նախատեսված է 2026 թվականի աշխարհի առաջնության համար, որը կլինի մրցաշարի պատմության մեջ ամենամեծը։ 39 օրվա ընթացքում կանցկացվի ռեկորդային 104 խաղ։

Ընտրված թեկնածուն կունենա մրցաշարի բոլոր խաղերը 4K հեռարձակմամբ FOX One հարթակում դիտելու հնարավորություն։ Դրա համար Նյու Յորքի Թայմս հրապարակի կենտրոնում կստեղծվի հատուկ տարածք, որտեղ կանցկացվի դիտումը։

Բացի այդ, աշխատակիցը կստեղծի բովանդակություն սոցիալական ցանցերի համար՝ կկիսվի հույզերով, կարճ ակնարկներով և խաղերի վառ պահերով։ Գաղափարն այն է, որ այս փորձը վերածվի լայն լսարանի համար  «երկրպագուների կենտրոնի»։ Կազմակերպիչները նշում են, որ իրենք փնտրում են ոչ այնքան մասնագետի, որքան վառ խարիզմայով, ֆուտբոլի հանդեպ սիրով և հանդիսատեսին գրավելու կարողությամբ օժտված անձի։ Մրցույթին մասնակցելու համար անհրաժեշտ է թարմացնել ձեր էջը Indeed-ում և հրապարակել տեսանյութ, որտեղ բացատրվում է, թե ինչու եք հարմար այս աշխատանքի համար։

Հաղթողը կսկսի աշխատանքը մրցաշարի մեկնարկից մի քանի օր առաջ և կաշխատի մինչև դրա ավարտը։

Հիշեցնենք, որ 2026 թվականի աշխարհի առաջնությունը կանցկացվի Միացյալ Նահանգներում, Մեքսիկայում և Կանադայում՝ 48 ազգային հավաքականների մասնակցությամբ, և կլինի ֆուտբոլի պատմության մեջ ամենամեծը։