Հայաստանի Առաջին խմբի երկու լավագույն ռմբարկուները միասին 50 գոլ են խփել

Հայաստանի Առաջին խմբի առաջնության 27-րդ տուրից հետո կրկին փոփոխություն է տեղի ունեցել ռմբարկուական պայքարի առաջատարների շարքում:

«Սարդարապատի» հարձակվող Համլետ Մինասյանը դուբլի հեղինակ է դարձել «Արարատ-Արմենիա-2»-ի դեմ խաղում: Այժմ հայ հարձակվողի հաշվին գրանցված է 26 գոլ: Նա հեղինակել է իր թիմի խփած բոլոր գոլերի (75) մոտ 35 տոկոսը:

Մինասյանի և Իսմայել Օգունսոլա Օլավալեի միջև ռմբարկուական մրցավազքը սկսվել է առաջնության հենց մեկնարկից և հիմա հասել է գագաթնակետին: Այս տուրում «Անդրանիկի» հարձակվողը գոլ չի խփել և մնացել է 24 գնդակով:

Այսպիսով, Առաջին խմբի երկու գլխավոր ռմբարկուները միասին արդեն խփել են 50 գոլ: Ռմբարկուական պայքարի 3-4-րդ տեղերը կիսում են Լևոն Վարդանյանը («Սարդարապատ») և Վիլիամս Իպեյեն («Հայք»):