Բարսելոնան ու Ռեալը պայքարում են Տոտենհեմի պաշտպանի համար
«Տոտենհեմի» և Իսպանիայի հավաքականի պաշտպան Պեդրո Պորոն մտադիր է վերադառնալ հայրենիք։ Ինչպես տեղեկացնում է Gol Digital-ը, ֆուտբոլիստի ծառայություններով հետաքրքրված են «Բարսելոնան» ու Մադրիդի «Ռեալը»։
Հաղորդվում է, որ իսպանացին, ում պայմանագիրը լոնդոնյան ակումբի հետ նախատեսված է մինչև 2028 թվականի ամառը, ցանկանում է լքել Անգլիայի Պրեմիեր լիգան։ «Տոտենհեմը», սակայն, մտադիր չէ բավարարվել քիչ գումարներով և հրաժեշտ տալ իր առաջատարներից մեկին ու նրա տրանսֆերի համար պահանջում է առնվազն 69 միլիոն եվրո։ Ըստ աղբյուրի՝ «Բարսելոնան» արդեն իսկ քայլեր է ձեռնարկում ավելի հարձակողական և դինամիկ աջ պաշտպան գտնելու ուղղությամբ, որը կկատարելագործի Հանսի Ֆլիկի մարտավարական համակարգը։
Կատալոնական ակումբին հատկապես գրավում է Պեդրո Պորոյի՝ ազատ տարածություններ գրոհելու, խաղադաշտին լայնություն հաղորդելու և եզրից մշտական վտանգ ստեղծելու ունակությունը։ Մյուս կողմից, Մադրիդի «Ռեալը» նրան դիտարկում է որպես Դանիել Կարվախալի հավանական փոխարինող։
Ընթացիկ մրցաշրջանում, բոլոր մրցաշարերում, 26-ամյա ֆուտբոլիստը մասնակցել է 44 հանդիպման՝ դառնալով 2 գոլի ու 5 գոլային փոխանցման հեղինակ։
