Եվրոպայի չեմպիոն Սամվել Գասպարյանը՝ ծանրամարտի ֆեդերացիայի գլխավոր քարտուղար
Ծանրամարտի Եվրոպայի 2021 և 2023 թվականների չեմպիոն Սամվել Գասպարյանը, որն ավելի վաղ հայտարարել էր մարզական կարիերան ավարտելու մասին, նշանակվել է Հայաստանի ծանրամարտի ֆեդերացիայի գլխավոր քարտուղարի պաշտոնում:
Գասպարյանն այս մասին գրառում է կատարել ֆեյսբուքի իր էջում:
«Մեծ սիրով ու պատասխանատվությամբ եմ սկսելու աշխատանքս հարազատ թիմում (ֆեդերացիայում): Ինչպես մարզական կարիերայիս ընթացքում, այնպես էլ հիմա՝ ծառայելու եմ հանուն մեր պետության ու գալիք հաղթանակների համար։
Շնորհակալությունն եմ հայտնում Հայաստանի ծանրամարտի ֆեդերացիայի նախագահ Արայիկ Հարությունյանին վստահության համար։
Շնորհակալ եմ նաև մեր բոլոր մարզիչներից, իմ հաջողություններում մեծ ներդրում կատարելու համար։ Վստահ եմ՝ մեր գրագետ և համերաշխ համագործակցության արդյունքում կհասնենք էլ ավելի մեծ հաջողությունների»,- գրել է Գասպարյանը։
Հիշեցնենք՝ այս պաշտոնում նա փոխարինել է Փաշիկ Ալավերդյանին:
