Forbes-ն Արոնյանին ներառել է 2024-ին աշխարհում ամենաշատ գումար վաստակած 10 գրոսմայստերների ցանկում

Forbes Sport-ը «Շախմատ+» մեդիա նախագծի հետ ներկայացրել է 2024-ին շախմատի շնորհիվ աշխարհում ամենաշատ գումար վաստակած 10 գրոսմայստերներին, որոնց շարքում է նաև Լևոն Արոնյանը: 42-ամյա Արոնյանը 10-րդ տեղում է՝ 257,385 դոլար ցուցանիշով: 

«Հավերժ երիտասարդ Լևոնը կրկին հասկացնում է, որ դեռ վաղ է իրեն թոշակի ուղարկել։ ԱՄՆ գավաթում շատերի համար անսպասելի հաղթանակը Արոնյանին բերել է 90,000 դոլար: Հետո հաջորդել են Grand Chess Tour-ում և Champions Chess Tour-ում հաղթանակները», - նշվում է հոդվածում:

Ցանկի առաջատարն աշխարհի գործող չեմպիոն, Հնդկաստանի 18-ամյա ներկայացուցիչ Գուկեշ Դոմարաջուն է (1,568,894 դոլար):

Երկրորդ տեղում աշխարհի նախկին չեմպիոն, չինացի Դին Լիրենն է (1,183,617 դոլար), իսկ եռյակը եզրափակում է նորվեգացի Մագնուս Կառլսենը (771,268 դոլար):