Երկու տարվա դադարից հետո կանցկացվի ծանրամարտի Հայաստանի առաջնությունը

Փետրվարի 7-11-ը Երևանի  օլիմպիական հերթափոխի պետական մարզական քոլեջում կանցկացվեն ծանրամարտի Հայաստանի տղամարդկանց և կանանց առաջնությունները։

Կանանց առաջնությանը կմասնակցի 24, տղամարդկանց առաջնությանը՝ 30 ծանրորդ։

«Անելու ենք ամեն ինչ, որ այս առաջնությունն անցկացվի միջազգային չափորոշիչներին համապատասխան։ Առաջնության ավարտից հետո որոշվելու են լավագույն մարզիկ և լավագույն մարզուհի անվանակարգի հաղթողները։ Կան առաջատար ծանրորդներ, որոնք վնասվածքի պատճառով չեն մասնակցելու, բայց կան նաև Եվրոպայի չեմպիոն ու մեդալակիր ծանրորդներ։ Կարող ենք ասել, որ դիտարժան առաջնություն ենք ունենալու»,-Sportmedia.am-ի հետ զրույցում նշեց Հայաստանի ծանրամարտի ֆեդերացիայի նորանշանակ գլխավոր քարտուղար, Եվրոպայի կրկնակի չեմպիոն, կարիերան ավարտած Սամվել Գասպարյանը։  

Հատկանշական է, որ նախորդ երկու տարիներին Հայաստանի առաջնություն չի անցկացվել։

Լուսանկարը՝ Mediamax-ի