Թեժ հանդիպում Չարենցավանում․ Նոան խուսափեց պարտությունից Վանի հետ խաղում

Fastex Հայաստանի Պրեմիեր լիգայի 29-րդ տուրում Վանը ընդունել էր Նոային:

Հանդիպումն ավարտվեց 2:2 հաշվով։ Խաղի հաշիվը 24-րդ րոպեին տուգանայինից կատարած շքեղ հարվածով բացեց Կարեն Նալբանդյանը։  55-րդ րոպեին Հելդեր Ֆերեյրան վերականգնեց հաշվի հավասարությունը։ 10 րոպե անց Նալբանդյանը դուբլ ձևակերպեց՝ առաջ մղելով Վանին, բայց հիմնական ժամանակին ավելացված 3-րդ րոպեին Գոնսալու Սիլվան փրկեց Նոայի համար 1 միավոր։ Խաղավարտից րոպեներ առաջ իրավիճակը մարզադաշտում լարվեց՝ բախում տեղի ունեցավ երկու թիմի երկրպագուների միջև, ինչին հանգեցրել էր միջադեպը Նոայի հարձակվող Գոնսալո Գրեգորիոյի ու Վանի գլխավոր մարզիչ Վահե Գևորգյանի միջև, որոնք կարմիր քարտ ստացան ու հեռացվեցին խաղադաշտից։ 

Վանը միջադեպից հետո կարող էր հաղթել, բայց Կարեն Նալբանդյանի հարվածից հետո Նոային փրկեց դարպասաձողը։

Այս խաղում հաղթելու դեպքում Նոան կարող էր վաղաժամ հռչակվել Հայաստանի չեմպիոն։

Հիշեցնենք, որ օրեր առաջ Վանը հաղթել էր Նոային՝ Հայաստանի գավաթի խաղարկության շրջանակում` ընդհատելով «Նոայի» պաշտոնական խաղերում անպարտելիության 13-խաղյա շարքը, որը բաղկացած էր միայն հաղթանակներից։

ՀՊԼ-ում Նոան միայն հաղթանակով էր հեռանում 19 անընդմեջ խաղում։ 

Այս հանդիպումից հետո Նոան 68 միավորով գլխավորում է մրցաշարային աղյուսակը։ Վանը 43 միավորով եզրափակում է լավագույն հնգյակը՝ շարունակելով պայքարել Եվրագավաթային ուղեգրի համար։