Նաիր Տիկնիզյանը կհեռացվի «Լոկոմոտիվի» հիմնական թիմի հետ մարզումներից

Մոսկվայի «Լոկոմոտիվի» պաշտպան Նաիր Տիկնիզյանը կհեռացվի երկաթուղայինների հիմնական թիմի հետ մարզումներից, հաղորդում է լրագրող Ալեքսանդր Իվանովը իր Telegram ալիքում։

Հիշեցնենք, որ ՌՊԼ-ի 29-րդ տուրի ԲԿՄԱ-ի հետ խաղից հետո ֆուտբոլիստն ասել էր, որ իրեն վտարված է զգում և կխնդրի ազատ արձակվել «Լոկոմոտիվից»։

«Լոկոմոտիվի» պաշտպան Նաիր Տիկնիզյանը ԲԿՄԱ-ի դեմ խաղի համար ընդգրկված էր «Երկաթուղայինների» հայտացուցակում, սակայն ամբողջ խաղն անցկացրեց պահեստայինների նստարանին։ 2025 թվականին միակ դեպքը, երբ Հայաստանի հավաքականի խաղացողը ՌՊԼ խաղում խաղացել է 90 րոպե, մարտի 7-ին էր՝ «Ախմատի» դեմ 20-րդ տուրի խաղում (1:1):

ՌՊԼ-ի 29 տուրից հետո «Լոկոմոտիվը» մրցաշարային աղյուսակում զբաղեցնում է վեցերորդ տեղը։