Ստեփան Ավագյանի հուշամրցաշար. Արամ Հակոբյանն առաջատարների թվում է
Ավարտվել է Ստեփան Ավագյանի հուշամրցաշարի վեցերորդ խաղափուլը, որում գրանցվել է մեկ հաղթանակ և չորս ոչ-ոքի։
Միակ հաղթանակը գրանցել է հնդիկ գրոսմայստեր Պրագնանանդան, որը սպիտակներով հանդես է եկել Բենջամին Գլեդուրայի դեմ։ Նիմցովիչի պաշտպանությունում նա ստացել է փոքր առավելություն, որը զարգացրել է հստակ պլանով, վերջնախաղում ճնշել մրցակցին և հասել իր երկրորդ անընդմեջ հաղթանակին։
Չինացի գրոսմայստեր Քսյու Քսյանգյուն և հայ գրոսմայստեր Արամ Հակոբյանը անցկացրել են հավասար պայքար, որը ավարտվել է հաշտությամբ։
Հայ գրոսմայստեր Ռոբերտ Հովհաննիսյանը փորձել է առավելություն ստանալ գերմանացի գրոսմայստեր Դմիտրի Կոլլարսի դեմ, սակայն սևերի ճշգրիտ պաշտպանությունը թույլ չի տվել զարգացնել նախաձեռնությունը, և պարտիան ավարտվել է ոչ-ոքի։
Հնդիկ գրոսմայստեր Արավինդ Չիտհամբարամը և ուզբեկ գրոսմայստեր Նոդիրբեկ Յակուբբոեվը անցկացրել են կարճ և հավասար պայքար, որն ավարտվել է հաշտությամբ։
Ամերիկացի գրոսմայստեր Սամուել Սևյանն ու Ջոնաս Բջերը նույնպես խաղն ավարտել են հաշտությամբ։ Սևյանը մի պահ ունեցել է փոքր առավելություն, սակայն չի կարողացել այն վերածել իրական հնարավորության:
6 տուրից հետո մրցաշարային աղյուսակը գլխավորում են Պրագնանանդան և Արավինդ Չիտհամբարամը՝ վաստակած 4-ական միավորով։ Նրանց հաջորդում են Արամ Հակոբյանը և Դմիտրի Կոլլարսը՝ 3.5 միավորով։
