Ըմբշամարտի ԱԱ․ Գալստյանը մեկնարկեց ջախջախիչ հաղթանակով․ Նազարյանը զիջեց 1/8-ում

Զագրեբում ընթացող հունահռոմեական ոճի աշխարհի առաջնությունում այսօր պայքարի մեջ մտած 67 կգ քաշային Սլավիկ Գալստյանը որակավորման փուլում մեկնարկեց վստահ հաղթանակով։ Նա 10։1 հաշվով ավարտեց ղազախ Դին Մուհամադ Կոշկարի դեմ գոտեմարտը։

87 կգ քաշային Վիգեն Նազարյանը, որը որակավորման փուլում հաղթել էր Նորվեգիան ներկայացնող ըմբիշին, 1/8-ում զիջեց ղազախ Իսլամ Եվլոևին։

Քիչ անց պայքարի դուրս կգա 63 կգ քաշային Կարեն Ասլանյանը։ Այսօր երեկոյան բրոնզե մեդալի համար կպայքարի 60 կգ քաշային Հրաչյա Պողոսյանը։

Մեր մարզիկներից իրենց մրցելույթներն ավարտել են 55 կգ քաշային Մանվել Խաչատրյանը, 82 կգ քաշային Սամվել Գրիգորյանը, 97 կգ քաշային Արթուր Ալեքսանյանն ու 130 կգ քաշային Ռազմիկ Քուրդյանը։

77 կգ քաշային կարգում աշխարհի չեմպիոն է դարձել Մալխաս Ամոյանը։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։