Մալխաս Ամոյանը հաղթեց Օլիմպիական չեմպիոնին ու դարձավ աշխարհի կրկնակի չեմպիոն. ՏԵՍԱՆՅՈՒԹ

Զագրեբում ընթացող ըմբշամարտի աշխարհի առաջնության հունահռոմեական ոճի 77 կգ քաշային կարգում Հայաստանը ներկայացնող Մալխաս Ամոյանը դարձել է չեմպիոն։

Ամոյանը եզրափակիչում մրցում էր Օլիմպիական խաղերի չեմպիոն, ճապոնացի Նաո Կուսակայի հետ ու հաղթանակի հասավ 10։1 հաշվով։

Մինչ եզրափակիչ հասնելը հայ ըմբիշը պայքարից դուրս էր թողել Պանամերիկյան խաղերի հաղթող, ԱՄՆ-ն ներկայացնող Քամալ Բեյին, լեհ Մատեուշ Բերնատեկին, թուրք Ահմեդ Յիլմազին ու իրանցի Ալիրեզա Աբդևալիին։

Սա Ամոյանի աշխարհի 2-րդ չեմպիոնությունն էր։ Հայ մարզիկը նաև Եվրոպայի քառակի չեմպիոն է։

Ամոյանի չեմպիոնական գոտեմարտը՝ մեր թելեգրամյան ալիքում։ 

Հիշեցնենք, որ երեկ Հայաստանը ներկայացնող ըմբիշներից պայքարից դուրս էին մնացել 55 կգ քաշային Մանվել Խաչատրյանը, 82 կգ քաշային Սամվել Գրիգորյանն ու 130 կգ քաշային Ռազմիկ Քուրդյանը։

Այսօր պայքարը սկսեցին ու դեռ պահպանում են բրոնզե մեդալ նվաճելու շանսերը 60 կգ քաշային Հրաչյա Պողոսյանը, 72 կգ քաշային Գոռ Խաչատրյանն ու 97 կգ քաշային Արթուր Ալեքսանյանը։

Վաղը՝ մրցումային նախավերջին օրը, պայքարի մեջ կմտնեն 63 կգ քաշային Կարեն Ասլանյանը, 67 կգ քաշային Սլավիկ Գալստյանն ու 87 կգ քաշային Վիգեն Նազարյանը։