Խաչատրյանը պարտվեց սփոփիչ գոտեմարտում

Զագրեբում ընթացող հունահռոմեական ոճի ըմբշամարտի աշխարհի առաջնության 72 կգ քաշային կարգում Հայաստանը ներկայացնող Գոռ Խաչատրյանը սփոփիչ 2-րդ գոտեմարտում 0։9 հաշվով զիջեց Իրանը ներկայացնող Սեյեդ Սոհրաբիին՝ զրկվելով բրոնզե մեդալ նվաճելու հնարավորությունից։

Սփոփիչ 1-ին գոտեմարտում Խաչատրյանը հաղթել էր ԱՄՆ-ն ներկայացնող Ալեխանդրո Սանչոյին։

Այսօր բրոնզե մեդալի համար կպայքարի 60 կգ քաշային Հրաչյա Պողոսյանը։

Քիչ անց պայքարը կսկսեն 67 կգ քաշային Սլավիկ Գալստյանն ու 63 կգ քաշային Կարեն Ասլանյանը։ Այսօր պայքարի մեջ մտած 87 կգ քաշային Վիգեն Նազարյանը մեկնարկեց հաղթանակով։

Մեր մարզիկներից իրենց մրցելույթներն ավարտել են 55 կգ քաշային Մանվել Խաչատրյանը, 82 կգ քաշային Սամվել Գրիգորյանը, 97 կգ քաշային Արթուր Ալեքսանյանն ու 130 կգ քաշային Ռազմիկ Քուրդյանը։

77 կգ քաշային կարգում աշխարհի չեմպիոն է դարձել Մալխաս Ամոյանը։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։