Գալստյանը փայլուն հաղթանակով դուրս է գալիս քառորդ եզրափակիչ, որտեղ կմրցի ադրբեջանցու հետ

Զագրեբում ընթացող հունահռոմեական ոճի ըմբշամարտի աշխարհի առաջնության 67 կգ քաշային կարգում Հայաստանը ներկայացնող Սլավիկ Գալստյանը 1/8 եզրափակիչում 9։3 հաշվով առավելության հասավ Ֆրանսիան ներկայացնող Գագիկ Սնջոյանի նկատմամբ։

Այսպիսով, Գալստյանը դուրս է գալիս քառորդ եզրափակիչ, որտեղ կմրցի Ադրբեջանը ներկայացնող 22-ամյա Հասրաթ Ջաֆարովի հետ։ Վերջինս 3 տարի անընդմեջ հռչակվել է Եվրոպայի չեմպիոն։

Այսօր պայքարը սկսել էին նաև 63 կգ քաշային Կարեն Ասլանյանը, որը 1/8 եզրափակիչում զիջեց ռուս Սերգեյ Եմելինին։

87 կգ քաշային Վիգեն Նազարյանը, որը որակավորման փուլում հաղթել էր Նորվեգիան ներկայացնող ըմբիշին, 1/8-ում զիջեց ղազախ Իսլամ Եվլոևին։

Հիշեցնենք, որ այսօր երեկոյան բրոնզե մեդալի համար կպայքարի 60 կգ քաշային Հրաչյա Պողոսյանը։

Մեր մարզիկներից իրենց մրցելույթներն ավարտել են 55 կգ քաշային Մանվել Խաչատրյանը, 82 կգ քաշային Սամվել Գրիգորյանը, 97 կգ քաշային Արթուր Ալեքսանյանն ու 130 կգ քաշային Ռազմիկ Քուրդյանը։

77 կգ քաշային կարգում էլ աշխարհի չեմպիոն է դարձել Մալխաս Ամոյանը։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։