Փոխարինվել են նոր մարզիչներով, որոնք պատրաստակամ են եռանդով աշխատել. Սամվել Գասպարյանը՝ ծանրամարտի հավաքականների փոփոխությունների մասին
Հայաստանի ծանրամարտի ֆեդերացիայի գլխավոր քարտուղար Սամվել Գասպարյանն այսօր հրավիրված մամուլի ասուլիսում անդրադարձել է ազգային հավաքականների մարզչական շտաբերում տեղի ունեցած փոփոխություններին:
«Մենք բոլոր մասնագետներին գնահատում ենք և ընդունում: Շնորհակալ ենք այն մասնագետներին, որոնք այս տարիներին աշխատել են ազգային հավաքականներում: Եղել են վերլուծություններ, որոնց արդյունքում ի հայտ են եկել, որ տղամարդկանց հավաքականում որքան էլ հաջողություններ եղել են, մարզիկների վնասվածքներն ու անհաջողություններն ավելի շատ են: Հիմա փոխարինվել են նոր մարզիչներով, որոնք պատրաստակամ են եռանդով աշխատել»,- ասել է նա:
Սամվել Գասպարյանը շեշտել է՝ մարզչական շտաբերի փոփոխությունները կապված չեն ներքին տարաձայնությունների, անձնական վատ փոխհարաբերությունների կամ այլ պատճառների հետ:
«Ինչ վերաբերում է Փաշիկ Ալավերդյանին, ապա նա բազմիցս է ասել, որ ցանկություն ունի այլ երկրների հավաքականներ մարզելու: Ֆեդերացիայի նպատակն է, որ չթողնենք, որ մարզիչները, մարզիկները ներկայացնեն այլ երկրներ»,-շեշտել է նա:
2025 թվականի ընթացքում Հայաստանի ծանրամարտի տարբեր տարիքային հավաքականներն, ընդհանուր առմամբ, նվաճել են 91 մեդալ:
Մեծահասակների հավաքականում երկարամյա գործունեություն իրականացրած գլխավոր մարզիչ Փաշիկ Ալավերդյանին փոխարինելու է թիմի երկրորդ մարզիչ Հակոբ Փիլոսյանը: Երկրորդ մարզիչ է նշանակվել ՀՀ երիտասարների հավաքականի երկրորդ մարզիչ Դավիթ Մուրադյանը:
ՀՀ երիտասարդների հավաքականի ավագ մարզիչ Մելիք Ղուկասյանի փոխարեն թիմը գլխավորելու է 2012-2014թթ. պատանիների, 2015-2022թթ. մեծահասակների, 2022-2023թթ. կանանց հավաքականի երկրորդ մարզիչ Վիգեն Խաչատրյանը: Երկրորդ մարզիչ է նշանակվել Երևանի ծանրամարտի մարզադպրոցի մարզիչ Վահրամ Գևորգյանը:
ՀՀ պատանիների հավաքականի երկրորդ մարզիչ է նշակավել Գյումրու Օլիմպիական հերթափոխի պետական մարզական քոլեջի մարզիչ Արսեն Թամրազյանը, իսկ պատանի աղջիկների հավաքականի ավագ մարզչի պաշտոնում կլինի Գյումրու մարզական բարձրագույն վարպետության դպրոցի մարզիչ Քրիստինե Պետրոսյանը:
