Արամայիս Հարությունյանը՝ Եվրոպայի Մ23 չեմպիոն (տեսանյութ)

Սերբիայի Զրենյանին քաղաքում ընթացող Մ23 տարեկանների Եվրոպայի առաջնությունում 130 կգ քաշային Արամայիս Հարությունյանը հռչակվեց Եվրոպայի չեմպիոն։

Եզրափակիչ գոտեմարտում Հարությունյանը մրցում էր Հունգարիան ներկայացնող Լաշլո Դարաբոսի հետ։ Գոտեմարտն ավարտվեց 1։1 հաշվով։

Մինչ եզրափակիչ հասնելը Հարությունյանը պայքարից դուրս էր թողել Լատվիայի (5:0), Ռուսաստանի (4:1) և Ուկրաինայի (6:0) ներկայացուցիչներին։

Ավելի վաղ, հունահռոմեական ոճում բրոնզե մեդալ էր նվաճել 55 կգ քաշային Մանվել Խաչատրյանը, արծաթե մեդալ՝ 77 կգ քաշային Սամվել Տերտերյանը։

Այսօր պայքարի մեջ մտած 5 հայ ըմբիշներից Սուրեն Աղաջանյանը վաղը կպայքարի ոսկու, իսկ Յուրիկ Հովեյանն ու Աշոտ Խաչատրյանը՝ բրոնզի համար։