Առանց տոմսի խաղադաշտ մուտք գործած երկրպագուն 1-ին անգամ կենթարկվի քրեական պատասխանատվության

Մանչեսթերցի 27-ամյա Բենջամին Բեյլին դարձել է առաջին երկրպագուն, ում պաշտոնական մեղադրանք է առաջադրվել առանց տոմսի, մեկ այլ անձի անմիջապես հետևից արգելապատնեշն անցնելու համար։ Նրան սպառնում է 1000 ֆունտ ստեռլինգ տուգանք և մարզադաշտեր մուտք գործելու 5 տարվա արգելք։

Միջադեպը տեղի է ունեցել «Մանչեսթեր Սիթիի» և «Արսենալի» միջև Անգլիայի լիգայի գավաթի եզրափակիչի ժամանակ։ Բեյլին ձերբակալվել է «Ուեմբլի» մարզադաշտ ապօրինի մուտք գործելու պահին։

Առանց տոմսի մարզադաշտ ներխուժելը քրեական հանցագործություն է դարձել միայն վերջերս՝ ի պատասխան ԵՎՐՈ 2020-ի եզրափակիչի ամոթալի իրադարձությունների։ Այն ժամանակ շուրջ 2000 երկրպագու առանց տոմսի ներխուժել էր «Ուեմբլի»՝ վտանգելով երկրպագուների կյանքերը։ Նախկինում նման արարքի համար իրավական հստակ պատժամիջոց չկար։

Լոնդոնի ոստիկանությունը հայտնել է, որ այս տարվա եզրափակիչում ձերբակալությունների թիվը նվազել է 78%-ով՝ նախորդ տարվա 91-ի փոխարեն դառնալով 20։ Ձերբակալվածների թվում կան անձինք, ովքեր մեղադրվում են ծեծկռտուքի (7 հոգի), անվտանգության ծառայության աշխատակցի վրա հարձակման, ռասիստական հողի վրա բռնության համար։

Նմանատիպ մեկ այլ դեպք է գրանցվել նաև «Տոտենհեմի» մարզադաշտում՝ «Նոթինգհեմ Ֆորեսթի» դեմ խաղի ժամանակ, որտեղ ևս մեկ երկրպագու ձերբակալվել է առանց տոմս խաղադաշտ մուտք գործելու կասկածանքով։