Զիդան, Կլոպ, իսկ հիմա նաև Սկալոնի. ո՞վ կփոխարինի Արբելոային Ռեալում

Մադրիդի «Ռեալը» Մաուրիսիո Պոչետինոյի, Զինեդին Զիդանի, Ժոզե Մոուրինյուի, Յուրգեն Կլոպի և Դիդիե Դեշամի թեկնածություններից բացի ակումբի գլխավոր մարզչի պաշտոնում Ալվարո Արբելոայի փոխարեն դիտարկում է նաև Արգենտինայի հավաքականը գլխավորող 47-ամյա Լիոնել Սկալոնիի տարբերակը։

Սկալոնիի պայմանագիրն աշխարհի գործող չեմպիոնների հետ լրանում է այս տարվա վերջին, սակայն համաձայնագրի երկարաձգման շուրջ բանակցություններն արդեն մեկնարկել են։ Սկալոնին Արգենտինայի հավաքականում մնալու ցանկություն է հայտնել, բայց չի շտապում նոր պայմանագիր ստորագրել։ Ներկայիս պաշտոնում աշխատանքի շարունակությունը նրա համար առաջնահերթություն է, սակայն նա կարող է դիտարկել նաև այլ տարբերակներ։

Նշվում է, որ Արգենտինայի ֆուտբոլի ասոցիացիայի նախագահ Կլաուդիո Տապիան ցանկանում է նոր պայմանագիր կնքել Սկալոնիի հետ մինչև ԱԱ-2026-ի մեկնարկը։

Այս շաբաթ «Ռեալը» դուրս մնաց Չեմպիոնների լիգայից՝ պարտվելով «Բավարիային» (1։2, 3։4)։ Լա Լիգայում մադրիդցիները զբաղեցնում են 2-րդ հորիզոնականը և մրցաշրջանի ավարտից 7 տուր առաջ «Բարսելոնայից» հետ են մնում 9 միավորով։