Օլիմպիական խաղերի փոխչեմպիոն, աշխարհի կրկնակի ոսկե մեդալակիր Վարազդատ Լալայանը կարիերայում երրորդ անգամ ճանաչվել է Եվրոպայի առաջնության հաղթող: Վրաստանի Բաթումի քաղաքում անցկացված առաջնության գերծանր քաշայինների պայքարում Լալայանը ոսկե մեդալը նվաճել է երկամարտի 451 կգ արդյունքով:
«Շատ պարտավորեցնող էր, որ կարողանայի պահպանել երրորդ տարին անընդմեջ պահել Եվրոպայի չեմպիոնի տիտղոսը: Մոտեցումներս մի քիչ լավ չստացվեցին. պոկում վարժությունում բարձրացրեցի այնքան, որքան այս պահին հնարավոր էր, երրորդ մոտեցմանն էլ չմոտեցա: Հրում վարժությունում առաջին մոտեցումը հաջող կատարեցի, իսկ երկրորդ և երրորդ մոտեցումներով պայքարում էի առաջնության լավագույն մարզիկ դառնալու համար, բայց չստացվեց: Այս Եվրոպայի առաջնության պատրաստականության փուլը փոքր-ինչ ուշ էի սկսել, երկար ժամանակ չէի մարզվել: Ասեմ, որ այնքան էլ լավ պատրաստ չէի, բայց ուժերս ներում էին այնքան, որ հաղթեի Եվրոպայի առաջնությունում: Մնացածն էլ աշխարհի առաջնությունում կուղղվի:
Միայն ուրախ եմ մրցակցության համար. եթե մրցակցությունը փոքր-ինչ ավելի մոտ լիներ, երևի ավելի լավ կիլոգրամներ կտեսնեինք: Ուրախ եմ, որ մրցակիցները շատացել են, և պատասխանատվությունն ավելի է մեծացել»,- Վարազդատ Լալայանի խոսքերը Բաթումիից փոխանցում է Sportmedia.am-ի թղթակիցը:
