Մենք այնտեղ ենք, որտեղ ցանկանում ենք լինել. Արտետան՝ «Ատլետիկոյի» հետ խաղի մասին
«Արսենալի» գլխավոր մարզիչ Միկել Արտետան Չեմպիոնների լիգայի կիսաեզրափակիչում Մադրիդի «Ատլետիկոյի» հետ դիմակայությունից առաջ կիսվել է սպասելիքներով: Թիմերի առաջին հանդիպումը կկայանա չորեքշաբթի՝ ապրիլի 29-ին, Մադրիդում:
«Հաղթանակը «Նյուքասլի» նկատմամբ տպավորիչ էր: Այն մեզ վստահություն հաղորդեց. երկրորդ տարին անընդմեջ խաղալ Չեմպիոնների լիգայի կիսաեզրափակչում՝ անհավանական է: Մենք ցանկանում ենք հաղթել և տիրել նախաձեռնությանը:
«Ատլետիկոն» հիանալի թիմ է, որն ունի այս մրցաշարում մեծ փորձառություն ունեցող մարզիչ: Մենք գիտենք, թե որքան բարդ է լինելու այս հանդիպումը: Պետք է խաղանք նույն վստահությամբ, որը ցուցադրել ենք նախկինում: Մենք այնտեղ ենք, որտեղ ցանկանում ենք լինել և մենք արժանի ենք դրան: Մեր առջև հնարավորություն է բացվում և մենք պետք է օգտվենք դրանից:
Յոթ տարի առաջ այս թիմը չէր խաղում Չեմպիոնների լիգայում, մենք զգալի հաջողությունների ենք հասել: Մենք շատ քրտնաջան ենք աշխատել և ցանկանում ենք օգտագործել շանսը: Մենք լավագույն չորս թիմերի թվում ենք. պատկերացրեք՝ որքան դժվար է դրան հասնելը:
Մենք երկուսս էլ (Սիմեոնեի հետ,-խմբ․) կիրք ունենք ֆուտբոլի հանդեպ: Ես միշտ հիացել եմ նրանով, բայց մեզանից յուրաքանչյուրն ունի իր ոճը: Նա օրինակելի կերպար է: Մենք ցանկանում ենք դոմինանտ լինել: Վաղը մեզ հրաշալի հանդիպում է սպասվում: Ցանկանում ենք խուսափել այն պահերից, երբ «Ատլետիկոն» ճնշում է մրցակցին: Մենք վերլուծել և հասկացել ենք դրանք», – ասել է Արտետան:
