Երիտասարդների ԱԱ․ Պոկումից հետո Նարեկ Մկրտչյանը 3 կգ է զիջում առաջատարին

Եգիպտոսի Իսմայիլիա քաղաքում ընթացող ծանրամարտի երիտասարդների աշխարհի առաջնության 79 կգ քաշային տղամարդկանց պայքարում Հայաստանի ներկայացուցիչ Նարեկ Մկրտչյանը պոկում վարժությունից հետո 5-րդն է և ընդամենը 3 կգ է զիջում առաջատարին։

Մկրտչյանը առաջին մոտեցումը ձախողեց, սակայն 2-րդ մոտեցմամբ պոկեց 145 կգ-ոց ծանրաձողը, իսկ վերջին մոտեցմամբ ֆիքսեց 150 կգ-ը։

Հրումի առաջին մոտեցման համար հայ ծանրորդը նախնական պատվիրել է 188 կգ, որը պատվիրված 2-րդ քաշն է։

Հայաստանի ներկայացուցիչներից պայքարն ավելի վաղ ավարտել էին 65 կգ քաշային Արտուշ Գրիգորյանը, որը 0 էր ստացել հրումում, 71 կգ քաշային Նարեկ Գրիգորյանը ու Հովհաննես Հովհաննիսյանը։

Գրիգորյանը փոքր ոսկե մեդալ էր նվաճել պոկում վարժությունում, սակայն հրումում ստացած վնասվածքի պատճառով մնացել էր առանց երկամարտի արդյունքի, իսկ Հովհաննիսյանը հրում վարժությունում նվաճել էր արծաթե մեդալ՝ երկամարտում զբաղեցնելով 4-րդ տեղը։ 69 կգ քաշային Մերի Միսակյանն էլ զբաղեցրել էր 6-րդ տեղը։