Երիտասարդների ԱԱ․ Նարեկ Մկրտչյանը՝ փոխչեմպիոն ու փոքր բրոնզե մեդալակիր

Եգիպտոսի Իսմայիլիա քաղաքում ընթացող ծանրամարտի երիտասարդների աշխարհի առաջնության 79 կգ քաշային տղամարդկանց պայքարում Հայաստանի ներկայացուցիչ Նարեկ Մկրտչյանը երկամարտի 336 կգ արդյունքով հռչակվեց փոխչեմպիոն։

Մկրտչյանը պոկում վարժությունում 5-րդն էր՝ 150 կգ արդյունքով։ Հրում վարժությունում հայ ծանրորդը գրանցեց 186 կգ՝ նվաճելով փոքր բրոնզե մեդալ։

Երիտասարդների աշխարհի չեմպիոն հռչակվեց եգիպտոսցի Աբդելրահման Համուդան՝ 341 կգ-ով։ Եգիպտոսի ներկայացուցիչը հաղթեց նաև առանձին վարժություններում։

Այսպիսով, Հայաստանը առաջին մեծ մեդալն է նվաճում աշխարհի այս առաջնությունում։

Հայաստանի ներկայացուցիչներից պայքարն ավելի վաղ ավարտել էին 65 կգ քաշային Արտուշ Գրիգորյանը, որը 0 էր ստացել հրումում, 71 կգ քաշային Նարեկ Գրիգորյանը ու Հովհաննես Հովհաննիսյանը։

Գրիգորյանը փոքր ոսկե մեդալ էր նվաճել պոկում վարժությունում, սակայն հրումում ստացած վնասվածքի պատճառով մնացել էր առանց երկամարտի արդյունքի, իսկ Հովհաննիսյանը հրում վարժությունում նվաճել էր արծաթե մեդալ՝ երկամարտում զբաղեցնելով 4-րդ տեղը։ 69 կգ քաշային Մերի Միսակյանն էլ զբաղեցրել էր 6-րդ տեղը։