Ծանրամարտի երիտասարդների ԱԱ. այսօր Հայաստանը մեկ ներկայացուցիչ կունենա
Եգիպտոսի Իսմայիլիա քաղաքում ընթացող ծանրամարտի երիտասարդների աշխարհի առաջնությունում մայիսի 6-ին Հայաստանն ունի միայն մեկ մասնակից:
Կանանց 77 կգ քաշային կարգում Երևանի ժամանակով 20:00-ին մրցահարթակ դուրս կգա Աննա Ամրոյանը:
Հիշեցնենք՝ երեկ Հայաստանն առաջին մեդալն էր նվաճել երկամարտում: 79 կգ քաշային տղամարդկանց պայքարում Հայաստանի ներկայացուցիչ Նարեկ Մկրտչյանը երկամարտի 336 կգ արդյունքով հռչակվել էր փոխչեմպիոն։
Հայաստանի ներկայացուցիչներից պայքարն ավելի վաղ ավարտել էին 65 կգ քաշային Արտուշ Գրիգորյանը, որը 0 էր ստացել հրումում, 71 կգ քաշային Նարեկ Գրիգորյանը ու Հովհաննես Հովհաննիսյանը։
Գրիգորյանը փոքր ոսկե մեդալ էր նվաճել պոկում վարժությունում, սակայն հրումում ստացած վնասվածքի պատճառով մնացել էր առանց երկամարտի արդյունքի, իսկ Հովհաննիսյանը հրում վարժությունում նվաճել էր արծաթե մեդալ՝ երկամարտում զբաղեցնելով 4-րդ տեղը։ 69 կգ քաշային Մերի Միսակյանն էլ զբաղեցրել էր 6-րդ տեղը։
Հայաստանի հավաքանի կազմում հանդես կգան նաև 94 կգ քաշային Վալերիկ Մովսիսյանը, 110 կգ քաշային Գրիգոր Ղազարյանը, +110 կգ քաշային Գագիկ Մկրտչյանը: Կանանց պայքարում մրցահարթակ դուրս կգա նաև 86 կգ քաշային Էմմա Պողոսյանը:
