Ծանրորդ Ալեքսանդրա Գրիգորյանը՝ երիտասարդների աշխարհի առաջնության բրոնզե մեդալակիր (տեսանյութ)

Հայ ծանրորդները սկսել են պայքարը Պերուի մայրաքաղաք Լիմայում ընթացող պատանիների և երիտասարդների աշխարհի առաջնությունում:

Մրցումային առաջին օրը կանանց 55 կգ քաշային կարգում Ալեքսանդրա Գրիգորյանը երիտասարդների պայքարում երկամարտի 204 կգ արդյունքով արժանացել է բրոնզե մեդալին: Պոկում վարժությունում Ալեքսանդրան գլխավերևում պահել է 85 և 88 կգ կշռող ծանրաձողերը: Հրում վարժությունում Ալեքսանդրան բարձրացրել է 116 կգ-ն: Այս վարժությունում նա նվաճել է ոսկե մեդալ: Տեսանյութը՝ այստեղ։

Հայաստանի երիտասարդական հավաքականի անդամ Հովհաննես Հովհաննիսյանն աշխարհի առաջնության պոկում վարժությունում բարձրացրել է 125 կգ, իսկ հրում վարժությունում՝ 155 կգ: Երկամարտի 280 կգ արդյունքով Հովհաննեսը 10-րդն է երիտասարդների աշխարհի առաջնությունում:

Մայիսի մայիսի 2-ի լույս 3-ի գիշերը՝ ժամը 03:30-ին, Հայաստանը կունենա մեկ մասնակից: 81 կգ քաշային կարգում հարթակ դուրս կգա Նարեկ Մկրտչյանը:

Հայաստանի հավաքականը պատանիների և երիտասարդների աշխարհի առաջնությանը կմասնակցի ընդհանուր 7 մարզիկով` 5 տղա, 2 աղջիկ: Հարթակ դուրս կգան` 81 կգ` Նարեկ Մկրտչյանը (մրցման օրը` մայիսի 3, մեկնարկը` 03:30. երիտասարդներ), 89 կգ` Վալերի Մովսիսյանը (մրցման օրը` մայիսի 4, մեկնարկը` 01:00. երիտասարդներ) 96 կգ` Գրիգոր Ղազարյանը (B ենթախումբ, մրցման օրը`մայիսի 3, մեկնարկը` 22:30. պատանիներ) +102 կգ` Հարություն Հովհաննիսյանը (մրցման օրը` մայիսի 5, մեկնարկը` 03:30. պատանիներ) 81 կգ` Էմմա Պողոսյանը (մրցման օրը` մայիսի 5, մեկնարկը` 01:00. երիտասարդներ)։

Երիտասարդների հավաքականի մարզիչները Մելիք Ղուկասյանն ու Դավիթ Մուրադյանն են, պատանիներինը` Երվանդ Կիրակոսյանը, իսկ կանանց թիմինը` Տարոն Թոմվասյանը: Հայաստանի պատվիրակության ղեկավարը Ծանրամարտի ֆեդերացիայի գլխավոր քարտուղար Սամվել Գասպարյանն է: