Երիտասարդների ԱԱ․ Նարեկ Գրիգորյանը ոսկե մեդալ նվաճեց պոկումում․ Հովհաննես Հովհաննիսյանը 14-րդն է

Եգիպտոսի Իսմայիլիա քաղաքում ընթացող ծանրամարտի երիտասարդների առաջնության 71 կգ քաշային տղամարդկանց պայքարում Հայաստանը ներկայացնող Նարեկ Գրիգորյանը պոկում վարժությունից հետո առաջատարն է։

Հայ ծանրորդը հաջողել է բոլոր 3 մոտեցումներն ու գլխավերևում պահել 139, 142 ու 144 կգ ծանրաձողերը՝ նվաճելով փոքր ոսկե մեդալ։

Հայաստանի մյուս ներկայացուցիչ Հովհաննես Հովհաննիսյանը հաջողեց միայն առաջին մոտեցում՝ պոկելով 130 կգ ու 14-րդն է։ Հովհաննիսյանը 2-րդ ու 3-րդ մոտեցումներով չկարողացավ ֆիքսել 134 կգ-ը։

Հիշեցնենք, որ պայքարն ավարտել է 65 կգ քաշային Արտուշ Գրիգորյանը, որը պոկում վարժությունում գլխավերևում պահելով 120 կգ-ը ավարտել էր 15-րդը, իսկ հրումում ձախողելով բոլոր մոտեցումները՝ մնացել էր առանց երկամարտի արդյունքի։