Արթուր Ալեքսանյանը պարտվեց քառորդ եզրափակիչում

Զագրեբում ընթանում է հունահռոմեական ոճի ըմբշամարտի աշխարհի առաջնությունը։

97 կգ քաշային կարգում Հայաստանը ներկայացնող Արթուր Ալեքսանյանը, որը 1/8 եզրափակիչում հաղթել էր չինացի ըմբիշին, քառորդ եզրափակիչում մրցում էր Ադրբեջանը ներկայացնող Մուրադ Ահմադիևի հետ ու պարտվեց տուշեով։ Ալեքսանյանը լավ էր մեկնարկել գոտեմարտը, ակտիվության համար միավոր էր ստացել, գլորում էր կատարել ու առջևում էր 3։0 հաշվով, սակայան Ահմադիևը կարողացավ դուրս գալ պաշտպանական դրությունից ու տուշե կիրառելով՝ հասավ հաղթանակի։

Այսօր պայքարի մեջ մտած 60 կգ քաշային Հրաչյա Պողոսյանն ու 72 կգ քաշային Գոռ Խաչատրյանը 1/8 եզրափակիչում զիջել են մրցակիցներին։ Այս ըմբիշները պահպանում են բրոնզե մեդալ նվաճելու շանսերը։

Ավելի վաղ, պայքարից դուրս են մնացել 55 կգ քաշային Մանվել Խաչատրյանը, 82 կգ քաշային Սամվել Գրիգորյանն ու 130 կգ քաշային Ռազմիկ Քուրդյանը։

Հիշեցնենք, որ այսօր ոսկե մեդալի համար կպայքարի 77 կգ քաշային Մալխաս Ամոյանը՝ եզրափակիչում մրցելով Օլիմպիական խաղերի չեմպիոն, ճապոնացի Նաո Կուսակայի դեմ։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։