4 ներկայացուցիչ, 1 մեդալ, 2 մարզիկ՝ առանց երկամարտի արդյունքի
Ալբանիայի Դուրրես քաղաքում ընթացող Եվրոպայի երիտասարդների և մինչև 23 տարեկանների առաջնություններում նոյեմբերի 2-ին Հայաստանը ներկայացնում էին 4 ծանրորդ։
Միակ մեդալը նվաճեց երիտասարդների խմբում հանդես եկող, 77 կգ քաշային Աննա Ամրոյանը։
Եվրոպայի գործող փոխչեմպիոնը պոկեց 98 կգ, հրեց 130-ը՝ նվաճելով հրում վարժության փոքր արծաթե մեդալ։ Երկամարտի 228 կգ արդյունքով Ամրոյանը նվաճեց բրոնզե մեդալ։
94 կգ քաշային կարգում Հայաստանի ներկայացուցիչներ Վալերի Մովսիսյանն ու Գրիգոր Ղազարյանը պատվոհարթակին չկանգնեցին։ Մովսիսյանը պոկեց 155, հրեց 185 կգ ու 340 կգ արդյունքով երկամարտում 5-րդն էր։
Գրիգոր Ղազարյանն էլ պոկեց 150, 2 անգամ չկարողացավ հրել 180 կգ-ն ու հրաժարվեց 3-րդ մոտեցումից՝ մնալով առանց երկամարտի արդյունքի։
Մ23 խմբում հանդես եկող Սուրեն Գրիգորյանը, թեպետ պոկում վարժությունից հետո 155 կգ արդյունքով 4-րդն էր՝ հրաժարվեց մասնակցել հրմանը։
Հիշեցնենք, որ այսօր՝ նոյեմբերի 3-ին, Հայաստանն այս առաջնությունում կունենա 5 ներկայացուցիչ։
