Միշա Մելքոնյանի, Վարդգես Մարգարյանի ու Ալինա Սուքիասյանի արդյունքները՝ ծանրամարտի երիտասարդների ու Մ23 առաջնությունում

Ալբանիայի Դուրրես քաղաքում ընթացող Եվրոպայի երիտասարդների և մինչև 23 տարեկանների առաջնություններում պայքարն ավարտեցին երիտասարդների խմբում հանդես եկող 110 կգ ու +110 կգ քաշային տղաներն ու Մ23 խմբում հանդես եկող +86 կգ քաշային աղջիկները:

Ներկայացնում ենք հայ ծանրորդների արդյունքները.

110 կգ քաշային Միշա Մելքոնյանը 161 կգ արդյունքով պոկում վարժությունում 5-րդն էր: Հրումում Մելքոնյանը գրանցեց 190 կգ ու զբաղեցրեց 7-րդ հորիզոնականը: Հայ ծանրորդը 7-րդն էր նաև երկամարտի 351 կգ արդյունքով: Այս քաշային կարգում հաղթող ճանաչվեց ուկրաինացի Դանիլո Չինիակովը՝ 374 կգ արդյունքով:

+110 կգ քաշային կարգում Հայաստանը ներկայացնող Վարդես Մարգարյանը 5-րդն էր պոկում վարժությունում՝ 162 կգ ցուցանիշով: Հրում վարժությունում Մարգարյանը ձախողեց բոլոր մոտեցումները՝ չկարողանալով գլխավերևում պահել 190 ու 192 կգ-անոց ծանրաձողերն ու մնաց առանց երկամարտի արդյունքի: Այստեղ Եվրոպայի չեմպիոն հռչակվեց Գեորգի Միանը (AIN)՝ երկամարտի 386 կգ արդյունքով:

Մինչև 23 տարեկանների +86 կգ քաշային կարգում Հայաստանը ներկայացնող Ալինա Սուքիասյանը պոկեց 99 կգ, հրեց 118 կգ ու երկամարտի 217 կգ արդյունքով գրավեց 4-րդ հորիզոնականը: Հայ մարզուհին 4-րդն էր նաև առանձին վարժություններում: Այս քաշային կարգում Եվրոպայի չեմպիոն հռչակվեց Թուրքիան ներկայացնող Ջևիկ Ֆաթմողուլը՝ 245 կգ-ով:

Հիշեցնենք, որ ավելի վաղ Եվրոպայի երիտասարդների չեմպիոն էին հռչակվել Ալեքսանդրա Գրիգորյանը, Տիգրան Կարապետյան և Էմմա Պողոսյանը: Արծաթե մեդալ էին նվաճել Նարեկ Գրիգորյանը, Նարեկ Մկրտչյանը, բրոնզե մեդալ՝ Մերի Միսակյանը և Աննա Ամրոյանը։

Մ23 խմբում հաղթող էր ճանաչվել Գառնիկ Չոլակյանը, Լիանա Գյուրջյանը: Բրոնզե մեդալ էր նվաճել Գոռ Սահակյանը։

Մրցումային վերջին օրը՝ նոյեմբերի 4-ին, Հայաստանը կունենա 4 ներկայացուցիչ: